واصلت النجمة شيرين عبدالوهاب حوارها مع جمهورها من خلال خاصية «ASK» عبر موقع تبادل الصور والفيديوهات الشهير «إنستجرام».
وردت على كل الأسئلة التي أرسلها جمهورها، وكان أهمها فيما يتعلق بزوجها السابق حسام حبيب، وجاءت الأسئلة كالآتي:
هل تدعمين حقوق النساء؟
طبعا.. أنا ست وأكيد طبعا بدعم المرأة في كل قضاياها، وده الكلام اللي قولته مع الأستاذة إسعاد يونس، إن إحنا أقوياء؛ ولإني بدعم المرأة في كل قضاياها، ربنا ما بيديش حلم تقيل غير للكتف اللي يشيل وإحنا ياما بنشيل.
هو بجد حسام حبيب رفع عليكي سلاح؟
طبعا لا أيه ده؟ إزاي يتقال كده؟ وبرده دي شهادة حتسأل فيها أمام ربنا.
ممكن أسألك سؤال خاص.. لو حابة تجاوبي عليه هو حسام حبيب فعلا زي ما الناس بتقول أخد فلوسك؟
بصراحة وبحق الله.. إن حسام عمره ما أخد مني فلوس، ولا استفاد مني ماديًا، بل بالعكس تمامًا أنا ما أعرفتش أحوش فلوس ليا غير لما اتجوزت حسام، علشان كان بعكس اللي بيتقال تمامًا، هو بيحافظ على مالي، ودي الصراحة عشان دي حاجة هتسأل عليها أمام ربنا ودي الحقيقة.
ما هو رأيك بقصة نيرة أشرف؟
أنا نفسيا الدكتور منعني من متابعة أي أخبار سلبية، ومش بتابع أي أخبار وبعيدة تمامًا؛ لأني حساسة جدا وبتأثر من الأخبار دي بس ربنا يصبر أهلها ويحتسبها في الجنة إن شاء الله.
كلمة عن الست أم كلثوم؟
كوكب الشرق بمعنى الكلمة يعني مافيش لقب أضخم من كده.
أكثر موسيقار تحبيه؟
دول كثير أوي.. الأستاذ محمد عبدالوهاب، أستاذ بليغ حمدي، أستاذ كمال الطويل، أستاذ محمد الموجي، أستاذ محمد فوزي، أستاذ فريد الأطرش، أستاذ عمر خيرت وناس كتير تانية صعب أكتبهم كلهم.
عمرك ركبتي خيل؟
أبويا كان بيركبني خيل زمان، بس دلوقتي بخاف علشان ضهري، بس أنا عندي حصان اسمه بهي علشان ولادي بياخدوا دروس فروسية ومريم متفوقة جدا فيها، وأنا بحب الخيل.
شيرين فيه خلاف بينك وبين عاصي الحلاني؟
عاصي ده أخويا الكبير، وبيشيلني في عنيه لما بنروح لبنان، وبنروح عنده كمان مزرعة الخيل.. والحقيقة أنا ما عنديش خلاف مع أي زميل أو زميلة كلهم حبايبي.
